Bishkekda Ukraina bayrog‘i uchun LED-displey bahsi.
Qirg‘iziston poytaxti Bishkek shahrida Ukraina elchixonasi va Qirg‘iziston prezidentining yangi qarorgohi – “Intimaq Ordo” o‘rtasida katta LED-displey o‘rnatildi. Bu haqda Zamin.uz xabar berdi.
Bu holat Rossiya prezidenti Vladimir Putinning Bishkekka tashrifi va Kollektiv Xavfsizlik Shartnomasi Tashkiloti (KXShT) sammiti arafasida yuz berdi. Jurnalist Grigoriy Pirlikning ma’lum qilishicha, bir necha qavatli bino balandligidagi bu displey Ukraina elchixonasidagi milliy bayroqni prezident qarorgohi tomonidan ko‘rinmas qilish uchun o‘rnatilgan bo‘lishi mumkin.
Qirg‘iziston prezidentining matbuot xizmati bu displeyning vazifasi davlat video kontentlarini namoyish etish va rasmiy tadbirlarga vizual ko‘mak berish ekanini bildirdi. Ammo ayrim ommaviy axborot vositalari displey o‘rnatilishini to‘g‘ridan-to‘g‘ri Putinning tashrifi bilan bog‘lashmoqda.
Ukraina elchixonasi maslahatchisi Denis Avtonomov bu hodisani Rossiya bilan bog‘liqligini inkor qilmasligini ta’kidladi. Siyosiy tahlilchi Turat Akimov esa bu ishni Rossiya Prezidentni qo‘riqlash xizmatining xavfsizlik choralari bilan izohladi.
KXShT sammiti yakunlari bo‘yicha matbuot anjumanida Vladimir Putin dekabr oyida AQSH delegatsiyasi Moskvaga kelib, Donald Trampning sulh rejasini muhokama qilishini tasdiqladi. U Rossiyaning tinchlikka erishish borasidagi shartlari bajarilmasa, harbiy harakatlar davom etishini va qurolli yo‘l bilan o‘z talablari amalga oshirilishini ta’kidladi.
Ukraina prezidenti devoni rahbari Andrey Yermak esa Kiyev Rossiya talablarini qat’iyan rad etishini ma’lum qildi. U Ukraina Konstitutsiyasi okkupatsiya qilingan hududlardan voz kechishga yo‘l qo‘ymasligini ta’kidlab, Zelenskiy prezident bo‘lgan davrda bunday imkoniyat mavjud emasligini bildirdi.
Yermakning so‘zlariga ko‘ra, Ukraina faqat urushayotgan tomonlar o‘rtasidagi chegaralarni muhokama qilishga tayyor.
