Yevroparlament yaqinda "Ukrainada adolatli va barqaror tinchlikka erishishda Yevropa Ittifoqining roli" nomli rezolyutsiyani qabul qildi. Bu haqda Zamin.uz xabar berdi.
Ushbu hujjatni 401 nafar deputat qo‘llab-quvvatladi. Deputatlar Yevropa Ittifoqi (YI) va unga a’zo davlatlarni Ukrainadagi tinchlik jarayonida yetakchi rolni o‘z zimmasiga olishga chaqirdi.
Rezolyutsiyada Rossiyaning tinchlikka intilmasligi va fuqarolik infratuzilmasiga hujumlarni davom ettirayotgani qayd etilgan. Shu bilan birga, AQShning Ukrainaga nisbatan "noaniq siyosati" tinchlikka erishishga to‘sqinlik qilayotgani tanqid qilindi.
Deputatlar barqaror tinchlik xalqaro huquq prinsiplari va Ukrainaning hududiy yaxlitligiga asoslanishi kerakligini ta’kidlashdi. Ularning fikriga ko‘ra, tinchlikka bosqinchiga yon berish orqali emas, balki Ukrainani qat’iy qo‘llab-quvvatlash orqali erishish mumkin.
Yevroparlament tinchlikka erishish bo‘yicha beshta asosiy talabni ilgari surdi. Ular quyidagilardan iborat: 1.
Rossiya qo‘shinlari Ukrainadan, xalqaro miqyosda tan olingan hududlardan to‘liq olib chiqib ketilishi kerak. Yevropa Ittifoqi vaqtincha bosib olingan hududlarni tan olmasligini bildirdi.
2. Rossiya Ukrainaga yetkazilgan moddiy va ma’naviy zararni to‘liq qoplash majburiyatini olishi shart.
3. Agressiya jinoyatlari va harbiy jinoyatlar uchun javobgarlik xalqaro sudlar va maxsus tribunal orqali ta’minlanishi lozim.
4. Kelishuv doirasida asirga olingan harbiylar, noqonuniy ushlab turilgan barcha fuqarolar va o‘g‘irlab ketilgan bolalar qaytarilishi kerak.
5. Rossiyaga qarshi joriy etilgan sanktsiyalar tinchlik kelishuvi to‘liq amalga oshirilmaguncha bekor qilinmaydi.
Shu bilan birga, Yevroparlament Rossiyaning muzlatilgan aktivlari hisobidan Ukrainaga "reparatsion kredit" taqdim etishni qo‘llab-quvvatlashini bildirdi. Bu mablag‘lar Ukrainaga tezroq yetkazilishi kerakligi ta’kidlandi.
