AQSH ma’muriyati 19 davlatdan kelgan chet elliklarning grin kartalarini qayta tekshirish jarayonini boshladi. Bu haqda Zamin.uz xabar berdi.
BBC xabariga ko‘ra, bu qaror Afg‘oniston fuqarosi tomonidan sodir etilgan qotillik va otishma ortidan qabul qilingan. Hodisa 26-noyabr kuni yuz bergan bo‘lib, unda Milliy gvardiyaning ikki harbiysi jarohatlangan, ulardan biri shifoxonada vafot etgan.
AQSH prezidenti Donald Tramp ushbu hujumchini keskin tanqid qilib, uni “hayvon” deb atagan va Afg‘onistondan kelgan migrantlarni qayta tekshirishni talab qilgan. Ma’lum bo‘lishicha, hujumni sodir etgan shaxs 2021-yilda maxsus viza dasturi orqali AQSHga kirgan, ammo viza muddati tugaganidan keyin noqonuniy ravishda yashashda davom etgan.
AQSH Fuqarolik va immigratsiya xizmati rahbari Jozef Edlou prezidentning bu topshirig‘ini tasdiqlab, xavfli deb baholangan mamlakatlardan kelgan har bir grin karta egasi alohida ko‘rib chiqilishini ma’lum qildi. Ro‘yxatda Afg‘oniston, Eron, Liviya, Sudan, Somali, Yaman, Kuba, Turkmaniston, Venesuela kabi davlatlar va yana bir necha mamlakatlar bor.
Umumiy hisobda 19 ta davlat kiritilgan. Edlouning so‘zlariga ko‘ra, AQSH xavfsizligini ta’minlash eng muhim vazifa hisoblanadi.
Tekshiruv jarayonining batafsil tafsilotlari hozircha oshkor qilinmagan. Shu bilan birga, o‘tgan hafta AQSH Bayden ma’muriyati davrida kiritilgan barcha qochqinlar ham qayta tekshirilishi haqida e’lon qilingan edi.
