Ukraina KTK hujumini o‘zini himoya qilish deb atadi
Ukraina Tashqi ishlar vazirligi Kaspiy quvuri konsortsiumining (KTK) dengiz terminaliga qilingan hujum bo‘yicha Qozog‘iston tomonidan bildirgan e’tirozga munosabat bildirdi. Bu haqda Zamin.uz xabar berdi.
Ukraina rasmiylari bu harakat Qozog‘istonga qarshi qaratilmaganini va u o‘zini himoya qilish doirasida amalga oshirilganini ta’kidladi. Ukraina Qozog‘istonning Novorossiysk shahridagi eksport terminaliga hujumdan so‘ng bildirgan xavotirini tushunganini qayd etdi.
Shu bilan birga, Ukraina BMT Nizomining 51-moddasiga asoslanib, har bir davlat o‘z hududini himoya qilish huquqiga ega ekanligini eslatdi. Bayonotda Qozog‘istonning Ukraina hududiga qilingan hujumlarga nisbatan sukut saqlayotgani tanqid qilindi va Qozog‘iston Rossiyani mojaro to‘xtatishga undashda yordam berishi lozimligi ta’kidlandi.
Ma’lum qilinishicha, KTK terminaliga 29-noyabrga o‘tar kechasi zarba berilgan. Natijada VPU-2 mooring qurilmasi jiddiy zarar ko‘rgan va uni qayta ishlatish imkonsiz bo‘lib qolgan.
Yuklash ishlari to‘xtatilgan, tankerlar esa akvatoriyadan chiqarilgan. Hodisada hech kim jabrlanmagan va dastlabki ma’lumotlarga ko‘ra, neft sizib chiqishi aniqlanmagan.
Mutaxassislarning hisob-kitobiga ko‘ra, KTK faoliyatining to‘xtatilishi Qozog‘istonga kamida 1,5 milliard AQSh dollari miqdorida zarar yetkazishi mumkin. Bu miqdor mamlakatning Ostona yoki Olmaota shaharlari yillik byudjetiga teng keladi.
