Qozog‘istonda YTHga uchragan avtobus yo‘lovchilari xavfsiz!
Qozog‘istonning Aqto‘be viloyatida «Moskva–Toshkent» yo‘nalishi bo‘yicha harakatlanayotgan VanHool avtobusi yo‘l-transport hodisasiga uchradi. Bu haqda Zamin.uz xabar berdi.
Bu haqda O‘zbekistonning Aqto‘be viloyatidagi konsulligi xabar berdi. Hodisa 30-noyabr kuni soat 21:00 da sodir bo‘lgan.
Avtobusda O‘zbekistonning 54 nafar fuqarosi bo‘lgan. YTH natijasida hech kim jarohatlanmagan va halok bo‘lmagan.
Hodisa sodir bo‘lganidan so‘ng, barcha yo‘lovchilar favqulodda vaziyatlar xizmati va politsiya xodimlari tomonidan xavfsiz tarzda evakuatsiya qilindi. Ular hozirda Aqto‘be viloyatining Aytekebi tumanidagi Qorabutoq qishlog‘ida joylashgan masjidga vaqtincha joylashtirilgan.
Yo‘lovchilarga oziq-ovqat va zarur yordam ko‘rsatilmoqda. Shuningdek, O‘zbekiston fuqarolarini qo‘shimcha avtobus orqali vatanga qaytarish choralari ko‘rilmoqda.
Voqea yuzasidan O‘zbekistonning Qozog‘istondagi elchixonasi va Bosh konsulligi mas’uliyatni o‘z zimmasiga olgan. Qozog‘istonning tegishli idoralari bilan hamkorlik yo‘lga qo‘yilgan.
Barcha chora-tadbirlar fuqaro xavfsizligini ta’minlashga qaratilgan.
