Moskvada milliy kamsituvchi ish e’lonlari taqiqlandi

Moskvada O‘zbekiston va Qirg‘iziston fuqarolarini ishga olishga qaratilgan reklama e’lonlari taqiqlangan. Bu haqda Zamin.uz xabar berdi.

Bu haqda "RIA Novosti" axborot agentligi xabar berdi. Moskva sudi mazkur qarorni qabul qilishda milliy kelib chiqish bo‘yicha kamsitish mumkin emasligini asos qilib keltirgan.

Prokuratura tomonidan internetda O‘zbekiston fuqarolariga maxsus shartlar taklif qilingan va Qirg‘iziston fuqaroligi talab qilingan ish e’lonlari aniqlangan. Sud bunday e’lonlarni noqonuniy deb topgan va bir nechta veb-saytlardagi bu turdagi ma’lumotlarni taqiqlagan.

Shuningdek, ushbu sahifalarga kirish imkoniyati foydalanuvchilar uchun cheklangan. Ma’lumotlarga ko‘ra, 2025 yilning dastlabki sakkiz oyida Rossiyaga 1,8 milliondan ortiq o‘zbekistonliklar kirib kelgan.

Ularning asosiy qismi mehnat migratsiyasi maqsadida Rossiyaga yo‘l olgan. Ushbu qaror mehnat bozorida milliy tenglikni ta’minlashga qaratilgan chora sifatida qabul qilinmoqda.