Qozog‘istonda chegarani buzganlarga jazolar kuchaytirildi
O‘zbekistonning Aktau shahridagi Bosh konsulligi Qozog‘istonda davlat chegarasini noqonuniy kesib o‘tganlik uchun joriy etilgan qat'iy choralar haqida ogohlantirdi. Bu haqda Zamin.uz xabar berdi.
Ma’lum qilinishicha, sentyabr oyidan boshlab bu borada jazolar yanada kuchaytirilgan. Ushbu qaror Qozog‘iston chegarasini noqonuniy ravishda kesib o‘tish holatlarining ko‘payishi sababli qabul qilingan.
Konsullikning xabar berishicha, noqonuniy harakatlar sodir etgan fuqarolar qo‘lga olingan va ularga nisbatan jinoiy javobgarlik choralarini qo‘llash amaliyoti yo‘lga qo‘yilgan. Shu munosabat bilan Bosh konsullik fuqarolarni davlat chegarasini kesib o‘tish bo‘yicha belgilangan tartiblarga qat’iy rioya qilishga chaqiradi.
Shuningdek, noqonuniy sxemalarda ishtirok etmaslik zarurligi alohida ta’kidlangan. Diplomatlar fuqarolarga kirish va chiqish qoidalariga rioya qilish, qonunbuzarliklardan saqlanish hamda jinoiy javobgarlikka tortilish xavfini oldini olish bo‘yicha ogohlantirish bilan murojaat qildi.
Bu borada barcha mas’uliyatli bo‘lishi lozimligi qayd etildi.
