Misrda kirish vizasi narxi oshirildi
Misrda 1-dekabrdan boshlab kirish vizasi narxi oshirildi. Bu haqda Zamin.uz xabar berdi.
Endilikda viza narxi 25 dollardan 45 dollarga ko‘tarildi. Ushbu qarorni mamlakat prezidenti Abdulfattoh as-Sisiy tasdiqladi.
Mazkur o‘zgarish turizm sohasi vakillari tomonidan norozilik bilan qabul qilindi. Misr Turizm palatalari federatsiyasi hukumatga murojaat qilib, vizalar narxini oshirish qarorini qayta ko‘rib chiqishni so‘radi.
Federatsiya mamlakatning xorijiy turistlar uchun raqobatbardoshligini yo‘qotishi va turistlar oqimining kamayib ketishidan xavotir bildirdi. Statistik ma’lumotlarga ko‘ra, 2024-yilda Misrga taxminan 15,7 million xorijlik tashrif buyurgan.
2025-yilning birinchi choragida esa Misrni 16,7 mingdan ortiq o‘zbekistonlik ziyorat qilgan. Bu ko‘rsatkich avvalgi davrlarga nisbatan ikki barobarga oshgan.
Shu bois, turizm sohasi vakillari bu qaror mamlakat iqtisodiyotiga salbiy ta’sir ko‘rsatishi mumkinligini ta’kidlashmoqda.
