O‘zbekiston Jenevada ekologik islohotlarni taqdim etdi
O‘zbekiston Jenevada bo‘lib o‘tgan Espo konvensiyasining 13-yig‘ilishida ekologik islohotlar va atrof-muhitga ta’sirni baholash bo‘yicha yangi yondashuvlarni taqdim etdi. Bu haqda Zamin.uz xabar berdi.
Ushbu yig‘ilishda mamlakatimiz delegatsiyasiga Davlat ekologik ekspertiza markazi direktori Gayrat Mahamedov boshchilik qildi. Tadbir davomida Mahamedov ekologik jarayonlarni raqamlashtirish, atrof-muhitga ta’sirni baholash (OVO‘S) va strategik ekologik baholash (SEO) tartiblarining yangilangan shakllari, shuningdek, jamoatchilik ishtirokini kengaytirish borasidagi ishlanmalar haqida ma’lumot berdi.
Yig‘ilishda ishtirokchilar energetika, mintaqaviy rivojlanish, iqlim o‘zgarishi va biologik xilma-xillikni saqlash sohalarida tajriba almashish va ekologik baholash samaradorligini oshirish masalalarini muhokama qildilar. Shuningdek, konvensiya talablarining bajarilishini monitoring qilish, Markaziy Osiyo mamlakatlari o‘rtasida ekologik hamkorlikni kuchaytirish, raqamli texnologiyalar va sun’iy intellektni ekologik sohada qo‘llash masalalari ko‘rib chiqildi.
Bu tashabbuslar ekologik barqarorlikni ta’minlashga xizmat qilishi kutilmoqda.
