Ozon bank xorijliklar uchun debit kartalar taqdim etadi

Rossiyaning Ozon banki O‘zbekiston, Qozog‘iston va boshqa davlatlar fuqarolari uchun debit kartalar rasmiylashtirishni yo‘lga qo‘ydi. Bu haqda Zamin.uz xabar berdi.

Ushbu xizmatdan 90 dan ortiq mamlakat aholisi foydalanishi mumkin. Karta olish uchun xorijiy fuqarolar pasport va Rossiyada bo‘lish huquqini tasdiqlovchi hujjatlarni taqdim etishlari zarur.

Ushbu kartalar orqali oyiga 3 million rublgacha (taxminan 462,5 million so‘m) naqd pul yechish, pul o‘tkazmalarini amalga oshirish, shuningdek, Ozon platformasida chegirmalar bilan xarid qilish va keshbek olish imkoniyati mavjud. Ozon bank kelgusida kartalar ochish mumkin bo‘lgan davlatlar sonini kengaytirishni rejalashtirmoqda.

Mazkur bank 2022 yilda tashkil etilgan bo‘lib, u ilgari Rossiya bozorida faoliyat yuritgan «Oney bank» negizida tashkil etilgan. Shu yilning iyul oyida Ozon bank Yevropa Ittifoqi tomonidan sanksiyalarga uchradi.

Shunga qaramay, bank SWIFT tizimidan uzib qo‘yilmagan, ammo tranzaksiyalar bo‘yicha ayrim cheklovlar joriy etilgan.