Labubu o‘yinchoqlarida xavfli modda aniqlandi
Rossiyada mashhur bo‘lgan Labubu o‘yinchoqlari bo‘yicha olib borilgan tekshiruvlar xavotirli natijalarni ko‘rsatdi. Bu haqda Zamin.uz xabar berdi.
“Roskachestvo” tashkiloti mutaxassislari tomonidan o‘yinchoqlarning sifati va xavfsizligi tekshirilib, 13 ta namunaning birida sog‘liq uchun xavfli modda — dioktilftalat miqdori ruxsat etilgan darajadan yuqori ekanligi aniqlangan. Tekshiruv davomida mahsulot 53 ta mezon bo‘yicha baholandi.
Ular orasida mato va tikuv sifati, yorliqda ko‘rsatilgan ma’lumotlarning to‘g‘riligini tekshirish, toksikologik va gigiyenik xavfsizlik ko‘rsatkichlari hamda umumiy zaharlilik darajasi bor edi. Natijada o‘yinchoq tarkibidagi dioktilftalat miqdori belgilangan 2 mg/litr me’yordan oshib, 2,9 mg/litrni tashkil qilgani qayd etildi.
Mutaxassislarning ta’kidlashicha, dioktilftalat moddasining yuqori miqdorda bo‘lishi bir qator salbiy oqibatlarga olib kelishi mumkin. Bu modda gormonlar muvozanatini buzishi, bolalar va homilador ayollar salomatligiga zarar yetkazishi, reproduktiv sog‘liqni yomonlashtirishi, xulq-atvor va nevrologik muammolarni kuchaytirishi, shuningdek, uzoq muddatda jigar va buyrak faoliyatiga salbiy ta’sir ko‘rsatishi mumkin.
Bundan tashqari, bu modda terida qichishish va allergik reaksiyalarni keltirib chiqarishi ehtimoli ham mavjud. Hozirda mutasaddi organlar Labubu o‘yinchoqlari bo‘yicha qo‘shimcha tekshiruvlar o‘tkazmoqda.
Ota-onalarga esa ushbu mahsulotni xarid qilishda ehtiyotkor bo‘lish tavsiya etilmoqda.
