Luvr muzeyida suv toshqini: 400 kitob zararlandi
Parijdagi dunyoning eng mashhur muzeylaridan biri — Luvrda favqulodda hodisa yuz berdi. Bu haqda Zamin.uz xabar berdi.
Muzeyning Misr sivilizatsiyasiga bag‘ishlangan bo‘limida suv quvuri yorilishi oqibatida taxminan 400 ta noyob kitob zarar ko‘rdi. Ushbu kitoblar 19-asr oxiri va 20-asr boshlariga tegishli bo‘lib, ular ilmiy tadqiqotlar uchun muhim ahamiyatga ega edi.
Olimlar, talabalar va muzey xodimlari ushbu kitoblardan muntazam foydalanib kelgan. Mahalliy ommaviy axborot vositalari xabariga ko‘ra, muzey xodimlari suv quvurida muammo borligini avvaldan bilgan.
Biroq ta’mirlash ishlari faqat 2026-yil sentyabr oyiga rejalashtirilgan edi. Kutilmaganda quvur yorilib, muzeyning qimmatbaho fondiga sezilarli zarar yetkazdi.
Bu hodisa Luvr muzeyida saqlanayotgan noyob asarlarning holati va ularga nisbatan ko‘rsatilayotgan e’tibor masalasini yana bir bor dolzarb qilib qo‘ydi. Mutaxassislar hozirda zarar ko‘rgan kitoblarni tiklash bo‘yicha ish olib bormoqda.
