9-10 dekabr kunlari Yer atmosferasida G2-G3 darajasidagi kuchli magnit bo‘ronlari kuzatilishi kutilmoqda. Bu haqda Zamin.uz xabar berdi.
Rossiya Fanlar akademiyasining Quyosh astronomiyasi laboratoriyasi mutaxassislari bu haqda ma’lumot berdi. Unga ko‘ra, eng kuchli ta’sir 9-dekabr kuni tushdan keyin sodir bo‘lishi mumkin.
Geomagnit buzilishlar 11-dekabrga qadar davom etishi ehtimol qilinmoqda. Quyoshdagi chaqnashlar muntazam qayd etilib boriladi, ammo ularning faqat kichik qismi Yerga ta’sir ko‘rsatadi.
Oxirgi kuchli magnit bo‘ron 12-13 noyabr kunlari kuzatilgan bo‘lib, o‘shanda G4 darajasidagi bo‘ron qayd etilgan edi. 1 dekabr kuni esa X sinfidagi chaqnash natijasida plazma buluti Yerga yon tomondan ta’sir ko‘rsatgan va G3 darajasiga yaqin geomagnit faollik yuzaga kelgan edi.
Mutaxassislarning taxminicha, bu safargi magnit bo‘ron kuchi ham shunga yaqin bo‘lishi mumkin. Mazkur hodisa qutb yoritgichlarini kuzatish uchun qulay sharoit yaratishi kutilmoqda.
Biroq olimlarning ta’kidlashicha, magnit bo‘ronning jiddiy salbiy oqibatlari bo‘lmaydi. Asosiy ta’sir magnit maydonidagi o‘zgarishlar va elektromagnit noqulayliklar bilan cheklanishi mumkin.
