Tramp: Ukraina urushda yutqazmoqda, muzokaralar zarur
AQShning sobiq prezidenti Donald Tramp Ukraina va Rossiya o‘rtasidagi urush yuzasidan o‘z fikrlarini bildirib, keskin bayonotlar berdi. Bu haqda Zamin.uz xabar berdi.
U Politico nashriga bergan intervyusida Ukraina rahbariyati va AQSh prezidenti Jo Baydenni tanqid qildi. Trampning fikricha, Ukraina hozirgi vaziyatni real baholashi va amaliy yechimlar izlashga kirishishi kerak.
Uning so‘zlariga ko‘ra, Ukraina maydonda yutqazmoqda va katta hududlarni boy berib qo‘ygan. Tramp bu holatni g‘alaba deb bo‘lmasligini ta’kidladi.
Shuningdek, u Rossiyaning geosiyosiy ustunligi, resurslari va kuchliroq pozitsiyasini inobatga olib, muzokaralar imkoniyatini ko‘rib chiqishni tavsiya qildi. Tramp o‘z intervyusida urushni Baydenning siyosiy xatosi deb atadi.
U yoshlarning urushda halok bo‘layotganidan chuqur afsusda ekanini aytib, bu urush uning prezidentligi davrida boshlanmagan bo‘lishini ta’kidladi. Tramp, shuningdek, Ukraina prezidenti Vladimir Zelenskiyni “mahoratli savdogar” deb atab, uning Bayden ma’muriyatidan katta moliyaviy yordam olishga muvaffaq bo‘lganini qayd etdi.
Ammo bu mablag‘larning natijasi yetarlicha samara bermaganini bildirgan holda, Ukraina hududlarining 25 foizi yo‘qotilganiga e’tibor qaratdi. Tramp, shuningdek, Qrimning yo‘qotilishi uchun sobiq prezident Barak Obamani aybladi.
U Ukrainada saylovlar o‘tkazish vaqti kelganini ta’kidlab, demokratiya so‘zda emas, amalda bo‘lishi kerakligini uqtirdi. Trampning fikricha, agar u prezident bo‘lganida, bu urush boshlanmagan va bugungi kunning tahlikali vaziyatlari yuzaga kelmagan bo‘lardi.
U hatto hozirgi sharoitda “Uchinchi jahon urushi” ehtimoli yuqori ekanini ham aytib o‘tdi.
