Xitoyda korrupsiya uchun hukm qilingan amaldor qatl etildi
Xitoyda poraxo‘rlik aybi bilan sudlangan China Huarong International Holdings Limited kompaniyasining sobiq rahbari Bay Tyanxuey ustidan hukm ijrosi 9-dekabr kuni amalga oshirildi. Bu haqda Zamin.uz xabar berdi.
Bu haqda mamlakatning rasmiy axborot agentligi "Sinxua" xabar berdi. Ma’lum qilinishicha, qatl jazosi Xitoy Oliy xalq sudi tomonidan tasdiqlanganidan so‘ng ijro etilgan.
Bay Tyanxuey 2024-yil may oyida Tyanjin shahri oraliq sudi tomonidan o‘lim jazosiga hukm qilingan edi. Sud uni umrbod siyosiy huquqlardan mahrum qilish, barcha shaxsiy mol-mulkini musodara qilish va noqonuniy daromadlarni davlat hisobiga o‘tkazish sharti bilan jazoladi.
Bay ushbu qaror ustidan shikoyat kiritdi, ammo 2025-yil fevral oyida Tyanjin Oliy xalq sudi apellyatsiyani rad etdi va ish Oliy xalq sudiga yuborildi. Sud tekshiruvlarida aniqlanishicha, Bay Tyanxuey 2014–2018-yillar oralig‘ida o‘z lavozim vakolatlaridan foydalangan holda turli loyihalarni moliyalashtirish va sotib olish jarayonlarida manfaatdor tomonlarga yordam bergan.
Buning evaziga u 1,108 milliard yuan (taxminan 157 million dollar) miqdorida pora olgan. Oliy xalq sudi bu holatni "ayniqsa og‘ir" jinoyat sifatida baholadi, chunki bu jinoyat nafaqat davlat manfaatlariga katta zarar yetkazgan, balki ijtimoiy oqibatlari ham salbiy bo‘lgan.
Xitoyda odatda korrupsiya uchun o‘lim jazosi darhol ijro etilmaydi. Bunday hollarda ikki yillik sinov muddati belgilanadi va qoidabuzarlik aniqlanmasa, jazo umrbod qamoq jazosi bilan almashtiriladi.
Ammo Bayning jinoyati bundan mustasno deb topildi va qatl jazosi darhol amalga oshirildi. Ma’lumotlarga ko‘ra, qatl ijrosidan oldin Bay Tyanxueyga yaqin qarindoshlari bilan uchrashishga ruxsat berilgan.
Bu Xitoyda o‘lim jazosi qo‘llaniladigan hollarda odatiy amaliyot hisoblanadi. Xitoy o‘lim jazosini keng qo‘llaydigan davlatlardan biri bo‘lib, qotillik, giyohvand moddalar savdosi va yirik iqtisodiy jinoyatlar kabi og‘ir jinoyatlar uchun ushbu jazo qo‘llaniladi.
Biroq mamlakatda qatl hukmi ijrosi bo‘yicha aniq statistika davlat siri sifatida saqlanadi.
