Qozog‘iston-O‘zbekiston chegarasidagi yuk tirbandligi bartaraf etildi

Qozog‘iston Bosh vaziri Oljas Bektenov Qozog‘iston-O‘zbekiston chegarasida yuzaga kelgan yuk vagonlari tirbandligi uchun javobgar bo‘lgan kompaniya rahbarlarini javobgarlikka tortishni talab qildi. Bu haqda Zamin.uz xabar berdi.

U mas’ullardan vaziyat bo‘yicha hisobot berishni so‘radi. "Qazaqstan temir joly" kompaniyasi rahbari Talg‘at Aldibergenovning ma’lumotiga ko‘ra, 7-8 dekabr kunlari O‘zbekiston transport vaziri bilan uchrashuvlar o‘tkazilgan.

Uchrashuv natijasida O‘zbekiston har kuni 1,8 ming vagongacha yukni qabul qilishga tayyorligini bildirgan. Bu kelishuv vaziyatni barqarorlashtirish va don eksportini qayta tiklash imkonini bergan.

Uchrashuv davomida bir nechta muhim qarorlar qabul qilingan. Jumladan, O‘zbekistonda tezkor shtab tashkil etilib, barcha mas’ul idoralar tun-u kun ishlash rejimiga o‘tgan.

Shuningdek, O‘zbekiston temir yo‘llari har kuni 1,8 ming vagongacha, jumladan, 250 vagondan iborat 35 ta poyezdni don, un va boshqa tovarlar bilan qabul qilishga tayyor ekanini ma’lum qilgan. Hozirgi kunda vaziyat barqarorlashgan, don eksporti tiklangan.

O‘zbekiston tomonidan tezkor choralar ko‘rilgani va mas’ul idoralar tinimsiz ishlayotgani qayd etildi.