Rossiya va Xitoy samolyotlari Yaponiyani xavotirga soldi

Yaponiya Mudofaa vazirligi Rossiya va Xitoy harbiy samolyotlari mamlakat yaqinida birgalikda parvoz qilganini ma’lum qildi. Bu haqda Zamin.uz xabar berdi.

Xabar berilishicha, Rossiyaning ikki bombardimonchi samolyoti Xitoyning ikki bombardimonchisi bilan uchrashib, birgalikda uzoq masofaga parvoz amalga oshirgan. Mazkur parvoz Okinava va Miyako orollari orasidan o‘tgan.

Ushbu harakatlarni kuzatish maqsadida Yaponiya o‘z qiruvchi samolyotlarini havoga ko‘targan. Bundan tashqari, Rossiyaning boshqa uchta harbiy samolyoti ham Yaponiyaga yaqin hududda payqalgani qayd etilgan.

Yaponiya mudofaa vaziri bu parvozni mamlakatga nisbatan bosim o‘tkazish va kuch namoyishi sifatida baholadi. U havo xavfsizligini ta’minlash uchun barcha zarur chora-tadbirlar ko‘rilganini ta’kidladi.

Shuningdek, Janubiy Koreya ham o‘sha kuni Rossiya va Xitoyga tegishli bir nechta samolyot uning hududi yaqinidan o‘tganini e’lon qildi. Mutaxassislar fikriga ko‘ra, ikki davlatning bunday qo‘shma parvozlarga e’tibor qaratayotgani mintaqada xavotirlarni oshirmoqda.