Putin Turkmanistonga tashrif buyuradi: asosiy maqsadlar.
Rossiya Prezidenti Vladimir Putin 11–12-dekabr kunlari rasmiy tashrif bilan Turkmaniston poytaxti Ashxobod shahriga boradi. Bu haqda Zamin.uz xabar berdi.
Ushbu tashrif haqida Kreml matbuot xizmati ma’lumot berdi. Putinning tashrifi Turkmanistonning xalqaro betaraflik maqomiga ega bo‘lganining 30 yilligi munosabati bilan o‘tkaziladigan tadbirlar, shuningdek, xalqaro tinchlik va ishonch yiliga bag‘ishlangan yirik forumda ishtirok etish bilan bog‘liq.
Mazkur forumga bir qancha davlat rahbarlari va xalqaro tashkilotlar vakillari ham taklif etilgan. Ashxobodda o‘tadigan forumda mintaqaviy xavfsizlik, diplomatik hamkorlik, energetika, transport va iqtisodiy aloqalarni rivojlantirish masalalari muhokama qilinadi.
Shuningdek, Putin tashrifi davomida Rossiya va Turkmaniston o‘rtasidagi strategik sheriklikni mustahkamlash, savdo-iqtisodiy hamkorlikni rivojlantirish, GES loyihalari va transport yo‘laklariga oid kelishuvlarni ko‘rib chiqish rejalashtirilgan.
