AQSh Vakillar palatasi 2026-yil uchun mudofaa byudjetini tasdiqladi. Bu haqda Zamin.uz xabar berdi.
Yangi byudjet miqdori 901 milliard dollarni tashkil etib, bu avvalgi yillarga nisbatan rekord darajada yuqori ko‘rsatkichdir. Hujjat 312 nafar kongressmen tomonidan tasdiqlangan bo‘lsa, 112 kishi qarshi ovoz bergan.
Hozirda qonun loyihasi Senat tomonidan ko‘rib chiqilmoqda va kelasi hafta tasdiqlanishi kutilmoqda. Mazkur byudjet AQSh prezidenti Donald Tramp talab qilgan miqdordan 8 milliard dollarga ko‘proqdir.
Bu hujjat Senat hamda Vakillar palatasi tomonidan ilgari taqdim etilgan takliflar o‘rtasida erishilgan murosali kelishuv asosida ishlab chiqilgan. Har ikki partiya yetakchilari ayrim masalalarda kelishmovchiliklarga qaramay, byudjetni qo‘llab-quvvatlashga chaqirgan.
Yangi byudjet Ukrainaga yillik 400 million dollar harbiy yordam ajratishni va Yevropa xavfsizligini mustahkamlash choralarini o‘z ichiga oladi. Shuningdek, AQSh harbiy xizmatchilarining maoshlarini 4 foizga oshirish hamda harbiy bazalardagi yashash sharoitlarini yaxshilash rejalashtirilgan.
Biroq, bepushtlikni davolash sug‘urtasi bilan bog‘liq band hujjatga kiritilmadi, chunki Vakillar palatasi spikeri Mayk Jonson bunga qarshilik ko‘rsatgan. Shuningdek, Donald Tramp tomonidan tanqid qilingan xilma-xillik va inklyuziya bo‘yicha treninglar dasturlariga mablag‘ ajratish qisqartirilgan.
Ushbu byudjet Pentagon dasturlarini belgilab beradi, biroq mablag‘ni to‘g‘ridan-to‘g‘ri ajratish uchun Kongress 2026-yil sentyabr oyiga qadar alohida qonun qabul qilishi lozim bo‘ladi.
