AQSh turistlardan ijtimoiy tarmoq ma’lumotlarini so‘raydi
AQSh hukumati xorijiy turistlarning shaxsiy ma’lumotlarini tekshirish tartibini kuchaytirmoqda. Bu haqda Zamin.uz xabar berdi.
Prezident Donald Tramp ma’muriyati tomonidan ishlab chiqilgan yangi tartibga ko‘ra, endi AQShga kiruvchilar so‘nggi besh yil davomida ishlatilgan ijtimoiy tarmoq akkauntlari tarixini taqdim etishlari kerak bo‘ladi. Bu haqda Federal reestrda ma’lumot berilgan.
Shuningdek, Bojxona va chegara xizmati turistlardan elektron pochta manzillari hamda telefon raqamlarini ham talab qilishi mumkin. Ushbu choralar AQShning viza siyosatini qat’iylashtirish maqsadida joriy etilmoqda.
Bu talab viza talab qilinmaydigan davlatlar fuqarolariga ham ta’sir qiladi. Masalan, Buyuk Britaniya va Germaniya fuqarolari AQShga kirish uchun onlayn ruxsatnoma olishlari lozim bo‘ladi.
Bundan oldin Tramp ma’muriyati AQSh konsulliklariga semizlik, saraton, diabet va yurak kasalliklari kabi muammolarga ega bo‘lgan shaxslarga vizani rad etish imkonini beruvchi yangi qoidalar joriy qilgan edi. Ushbu qoidalar mazkur kasalliklar AQSh uchun uzoq muddatda tibbiy xarajatlarni oshirishi mumkinligi bilan izohlangan.
