Larri Ellison bir kunda 27 milliard dollar yo‘qotdi
Oracle kompaniyasining asoschisi Larri Ellison bir kunda o‘z boyligining qariyb 27 milliard dollarini yo‘qotdi. Bu haqda Zamin.uz xabar berdi.
Bu haqda Forbes Real-Time Billionaires reytingida ma’lumot berildi. 2025-yil 12-dekabr kuni ertalabki holatga ko‘ra, Larri Ellisonning umumiy boyligi 249,5 milliard dollarni tashkil etdi.
Bu ko‘rsatkich bir kun oldingi qiymatdan qariyb 10 foizga kam. Hozirda u dunyodagi eng boy insonlar ro‘yxatida uchinchi o‘rinni egallab turibdi.
Uning oldida Ilon Mask va Larri Peyj joylashgan. Ellisonning boyligidagi bu sezilarli pasayish Oracle kompaniyasi aksiyalarining keskin tushib ketishi bilan bog‘liq.
Nyu-York fond birjasidagi savdolarda Oracle aksiyalari qiymati 10,8 foizga pasayib, 198,85 dollarga tushdi. Kun davomida esa aksiyalardagi pasayish 16,5 foizga yetdi.
Investorlarning bunday salbiy munosabatiga Oracle’ning 2026-moliyaviy yilning ikkinchi choragi bo‘yicha e’lon qilgan hisobot natijalari sabab bo‘ldi. Kompaniya prognozlardan past natijalarni ko‘rsatdi va kapital xarajatlarining sezilarli oshishi haqida ogohlantirdi.
Bundan tashqari, Oracle korporatsiyasining qarz majburiyatlari ham xavotir uyg‘otmoqda. Kuz faslida kompaniya yangi ma’lumot markazlarini qurish uchun 18 milliard dollarlik obligatsiyalar chiqarib, yirik bank kreditlarini jalb qilgan edi.
Citi tahlilchilarining fikricha, Oracle kelgusi uch yil davomida har yili 20-30 milliard dollar miqdorida qo‘shimcha qarz mablag‘lariga ehtiyoj sezishi mumkin. Bu holat kompaniyaning moliyaviy barqarorligiga ta’sir ko‘rsatishi mumkin.
