Oltin narxi rekord darajaga yetdi
2026-yil fevral oyida yetkazib beriladigan oltin fyucherslari Nyu-Yorkdagi Comex birjasida bir troya untsiyasi uchun 4367 dollarga yetdi. Bu haqda Zamin.uz xabar berdi.
Bu ko‘rsatkich 2025-yil 21-oktyabrdan beri eng yuqori darajaga chiqdi. Toshkent vaqti bilan soat 16:37 da oltinning narxi 4369 dollarga, soat 17:04 da esa 4372 dollarga yetgani qayd etildi.
Aprel oyida Goldman Sachs banki yil oxiriga kelib oltin narxi bir untsiya uchun 3700 dollarga yetishini prognoz qilgan edi. Ularning fikricha, bu ko‘tarilish global markaziy banklar tomonidan oltinga bo‘lgan talabning oshishi bilan bog‘liq.
2025-yil boshidan buyon dunyo bo‘ylab markaziy banklar jami 254 tonna oltin xarid qilishgan. Eng yirik xaridor davlatlar sifatida Polsha va Qozog‘iston qayd etilgan.
Faqatgina oktyabr oyida markaziy banklar tomonidan 53 tonna oltin sotib olingan, bu esa o‘tgan yilga nisbatan 36 foizga ko‘proqdir. 2025-yil 1-dekabr holatiga ko‘ra, O‘zbekistonning oltin-valyuta zaxiralari 61,2 milliard dollarga yetib, rekord darajani qayd etdi.
Jismoniy oltin hajmi esa oy davomida 12,2 million troya untsiyasigacha oshdi.
