NATO: Rossiyaning agressiyasini to‘xtatish shart
NATO bosh kotibi Mark Ryutte 11-dekabr kuni Berlinda o‘z chiqishida Rossiya prezidenti Vladimir Putinning Ukrainaga qarshi urush bilan to‘xtab qolishni istamasligi mumkinligini ta’kidladi. Bu haqda Zamin.uz xabar berdi.
Uning fikricha, Rossiyaning maqsadi Ukraina bilan cheklanmasdan, yanada kengroq bo‘lishi ehtimoldan xoli emas. Shu sababli NATOning asosiy vazifasi Rossiyaning agressiyasini to‘xtatishga qaratilgan bo‘lishi kerak, dedi u.
Ryutte NATO a’zolarini urushning oldini olish va mudofaa imkoniyatlarini oshirishga chaqirdi. U Ukrainaga harbiy va moliyaviy yordamni kuchaytirish zarurligini ta’kidladi.
Uning aytishicha, Ukraina o‘zini himoya qilish uchun zarur vositalarni hozirning o‘zida olishi lozim. "Qurolli kuchlarimiz himoya uchun barcha zarur vositalar bilan ta’minlanishi kerak", — dedi Ryutte.
Shuningdek, u NATO ittifoqchilari vaziyatning jiddiyatini to‘liq anglab yetmayotganini qayd etdi. Uning fikriga ko‘ra, vaqt NATO tomonida emas va harakatlarni kechiktirish katta xatolarga olib kelishi mumkin.
Ryutte, shuningdek, AQSHning Ukrainadagi urushni to‘xtatish bo‘yicha sa’y-harakatlarini tilga oldi va Rossiyaga nisbatan bosimni saqlab qolish zarurligini ta’kidladi. Mark Ryutte Rossiyaning Ukrainani ishg‘ol qilish ehtimoli borligi haqida ham ogohlantirib o‘tdi.
Unga ko‘ra, bunday holatda Rossiya va NATO o‘rtasidagi chegara yanada kengayib, qurolli to‘qnashuv xavfi oshishi mumkin. Bu esa NATOga yangi byudjetlar ajratish, mudofaa sohasida katta o‘zgarishlar qilish va moliyaviy yukni oshirishni talab etadi.
Ryutte iqtisodiy inqirozlar va davlat xarajatlarini qisqartirish zarurati yuzaga kelishi mumkinligini ham alohida ta’kidladi. Uning so‘zlariga ko‘ra, Ukrainadagi vaziyat NATO xavfsizligi bilan uzviy bog‘liq.
Shu bois, NATO Ukrainaga yordamni davom ettirishi va Rossiyaning agressiv harakatlariga qarshi qat’iy choralar ko‘rishi zarur.
