Ukraina Qurolli Kuchlari (UQK) bo‘linmasi "Chernaya Iskra" nomli isyonchi guruh bilan hamkorlikda Kaspiy dengizida Rossiyaga tegishli ikkita kemaga hujum uyushtirdi. Bu haqda Zamin.uz xabar berdi.
Bu kemalar “Kompozitor Raxmaninov” va “Askar-Saridja” nomlari bilan tanilgan bo‘lib, harbiy yuk tashishda ishtirok etgani va Eron bilan hamkorlik qilgani uchun AQSH tomonidan sanksiyalar ostiga olingan. Ma’lumotlarga ko‘ra, hujum 12-dekabr kuni Qalmiqiston Respublikasi sohillari yaqinida amalga oshirilgan.
Kemalarning Ukrainaga qarshi urushda qo‘llanadigan qurol-yarog‘ va harbiy texnikani tashiyotgani aytilmoqda. UQK bergan bayonotda isyonchi guruh tomonidan kemalarning yo‘nalishi va yuklari haqida batafsil ma’lumot taqdim etilgani qayd etilgan.
Hujum oqibatlari haqida aniq ma’lumot berilmagan, shuningdek, Rossiya rasmiylari bu voqeaga izoh bermagan. Ukraina harbiylari maxsus operatsiyalar davomida Rossiya armiyasining harbiy salohiyatini pasaytirish maqsadida asimmetrik usullarni qo‘llayotganini ta’kidladi.
Shuningdek, Ukraina Xavfsizlik Xizmatining (SBU) “Alfa” maxsus bo‘linmasi uzoq masofali dronlar yordamida Kaspiy dengizidagi Filanovskiy neft platformasiga ham zarba bergan. Bu platforma “Lukoyl-Nijnevoljskneft” kompaniyasiga tegishli bo‘lib, hujum natijasida uning faoliyati to‘xtatilgan.
SBU vakillariga ko‘ra, bu Ukraina tomonidan Kaspiy dengizida Rossiyaning neft qazib olish infratuzilmasiga uyushtirilgan ilk hujumdir. Mazkur harakatlar Ukraina va Rossiya o‘rtasidagi ziddiyatlarning yangi bosqichga o‘tganini ko‘rsatmoqda.
