AQShning Nyu-York shtatida olimlar 450 million yil muqaddam Yer yuzida yashagan, ilgari noma’lum bo‘lgan dengiz jonzotining noyob qoldiqlarini topishdi. Bu haqda Zamin.uz xabar berdi.
Ushbu yangi turga Lomankus edgecombei deb nom berildi. Topilmaning eng e’tiborga molik jihati shundaki, bu organizmlar deyarli mukammal holatda saqlanib qolgan.
Millionlab yillar davomida ularning kichik tana tuzilishi asta-sekin metall, xususan, pirit bilan almashgan. Natijada ularning shakli va anatomiyasi deyarli o‘zgarmagan holda bizgacha yetib kelgan.
Oksford universiteti paleobiologi Lyuk Perrining so‘zlariga ko‘ra, pirit kislorodsiz muhitda bakteriyalar organik to‘qimalarni parchalaganida hosil bo‘ladi. Ushbu jarayonda ajralgan gazlar temir bilan reaksiyaga kirishib, sulfid hosil qiladi.
Perri bunday qoldiqlarni “pirit hosil bo‘lishi uchun maxsus tayyorlangan miniatyura orolchalarga o‘xshatadi”. Mutaxassislarning fikricha, uch o‘lchamli holda mukammal saqlangan ushbu qoldiqlar qadimgi bo‘g‘imoyoqlilar tuzilishi va ularning evolyutsiya jarayonini chuqurroq o‘rganishga imkon beradi.
Ayniqsa, o‘sha davrda qo‘shimcha oyoqlarning mo‘ylov, qisqich yoki tishsimon tuzilmalarga aylanish jarayoni bo‘yicha muhim ma’lumotlar aniqlangan. Bu topilma qadimgi hayot shakllarini o‘rganish uchun ulkan ahamiyatga ega.
