Messining qisqa tashrifi hind muxlislarini ranjitdi
Hindistonning mashhur “Solt-Leyk” stadionida Lionel Messini ko‘rishni orzu qilgan minglab muxlislar o‘rtasida hayajon tartibsizlikka aylangan. Bu haqda Zamin.uz xabar berdi.
“Times of India” nashrining xabar berishicha, argentinalik futbol afsonasi Kalkuttadagi stadionga chiqib, muxlislarga qo‘l silkitib salom bergan va qisqa mashqlar bajargan. Ammo bir necha daqiqadan so‘ng u stadionni tark etgan.
Ushbu vaziyat uzoq vaqt kutgan muxlislarning noroziligiga sabab bo‘lgan. Ko‘plab sport ixlosmandlari Messini ko‘rish uchun qimmat chiptalar sotib olishgan.
Ayrim muxlislar chipta uchun 100 dollardan ko‘proq mablag‘ sarflagan, bu esa Hindistondagi o‘rtacha bir oylik ish haqiga teng. Ularning aytishicha, qisqa davom etgan uchrashuv bunday katta xarajatga arzimagan.
Stadionda VIP mehmonlar va amaldorlar Messini o‘rab olgani bois oddiy muxlislar uni yaqin masofadan ko‘ra olmagan. “Messi atigi 10 daqiqa ko‘rindi.
Biz hech narsani ko‘rmadik. Shuncha kutganimiz va qilgan xarajatlarimiz bekor ketdi”, — deydi norozilik bildirgan muxlislardan biri.
Ma’lumotlarga ko‘ra, Lionel Messi “Inter Mayami”dagi jamoadoshlari Luis Suares va Rodrigo De Paul bilan birga uch kunlik tashrif doirasida Haydarobod, Mumbay, Dehli va Kalkutta shaharlariga borgan. Uning Hindistonga safari katta qiziqish bilan kutib olingan edi.
