Yaponiya yaqin kelajakda pandalarsiz qolishi mumkin, deb xabar bermoqda Kyodo axborot agentligi. Bu haqda Zamin.uz xabar berdi.
Xitoy hukumati bilan yuzaga kelgan sovuq munosabatlar sababli, Yaponiyadagi so‘nggi ikki panda kelasi yil boshida o‘z vataniga qaytariladi. Pandalar Xitoyning milliy ramzi va boyligi hisoblanadi.
Ular Xitoy hukumati tomonidan chet davlatlardagi hayvonot bog‘lariga ijaraga beriladi. Kyodo agentligining qayd etishicha, Yaponiyada yashayotgan pandalar bu mamlakatda tug‘ilgan bo‘lsa-da, ular Xitoy mulki hisoblanadi.
Xitoy ilk bor 1972 yilda ikki davlat o‘rtasidagi diplomatik aloqalarni yaxshilash maqsadida Yaponiyaga pandalarni yuborgan edi. Pandalar yillar davomida yapon xalqining mehrini qozonib, mamlakatdagi mashhur turistik obyektlardan biriga aylangan.
Biroq so‘nggi paytlarda Tokio va Pekin o‘rtasidagi munosabatlar taranglashgan. Yaponiyaning bosh vaziri Sane Takaichining Xitoyning Tayvanga nisbatan ehtimoliy harakatlari Yaponiyani mojaroga jalb qilishi mumkinligi haqidagi bayonoti vaziyatni keskinlashtirdi.
Bu holatni yanada murakkablashtirgan voqea esa Osakadagi Xitoy konsulining Takaichini haqorat qiluvchi bayonoti bo‘ldi. Shu sababli, ikki davlat o‘rtasidagi munosabatlarda yangi ziddiyatlar yuzaga kelmoqda.
