Xitoy hukumati 2026 yildan e’tiboran tug‘ruq bilan bog‘liq barcha tibbiy xarajatlarni to‘liq davlat hisobidan qoplashni rejalashtirmoqda. Bu haqda Zamin.uz xabar berdi.
Ushbu chora yosh oilalarni farzandli bo‘lishga rag‘batlantirish va mamlakatda kuzatilayotgan demografik pasayishni oldini olish maqsadida qabul qilinmoqda. Bu haqda Milliy sog‘liqni saqlash xavfsizligi boshqarmasi ma’lumot berdi.
Yangi tartibga ko‘ra, tug‘ruq jarayoni bilan bog‘liq barcha tibbiy xizmatlar, jumladan, tug‘ruqdan oldingi tekshiruvlar, diagnostika va boshqa ko‘riklar xarajatlari davlat tomonidan to‘liq qoplanadi. Shu tariqa, oilalar zimmasidan moliyaviy yukni kamaytirish va “cho‘ntakdan xarajatsiz tug‘ruq” tizimini ta’minlash ko‘zda tutilmoqda.
Mazkur qaror Xitoyda aholi sonining kamayishini to‘xtatish hamda demografik barqarorlikni ta’minlashga qaratilgan keng ko‘lamli siyosatning bir qismi hisoblanadi. Statistik ma’lumotlarga ko‘ra, Xitoy aholisi 2022 yilda birinchi marta qisqargan va bu tendensiya keyingi yillarda ham davom etgan.
Ekspertlarning fikricha, tug‘ilish darajasining pastligi sababli aholi soni qisqarishda davom etishi mumkin. Bu esa ishchi kuchining kamayishi va keksa avlod ulushining ortishi orqali iqtisodiyotga salbiy ta’sir ko‘rsatadi.
Tug‘ilish darajasining pasayishiga uzoq yillar davomida amal qilgan “bir bola siyosati”, urbanizatsiya jarayonlari, ta’lim va bolalarni parvarish qilish xarajatlarining yuqoriligi, iqtisodiy o‘sishning sekinlashishi kabi omillar sabab bo‘lgan. Yoshlar orasida oila qurish va farzand ko‘rishni kechiktirish holatlari keng tarqalgan.
Ayrim provinsiyalarda, jumladan, Szilin, Szyansu va Shandunda tug‘ruqni deyarli bepul qilish amaliyoti allaqachon joriy etilgan. Shu bilan birga, markaziy hukumat bolalar parvarishi uchun subsidiya ajratish, maktabgacha ta’limni arzonlashtirish yoki bepul qilish, tug‘ruq ta’tilini uzaytirish, shuningdek, soliq va uy-joy bo‘yicha imtiyozlar berish kabi qo‘shimcha chora-tadbirlarni ham rejalashtirmoqda.
Bu siyosatning asosiy maqsadi oilalarni ko‘p bolali bo‘lishga undash va demografik muvozanatni tiklashdir.
