Qozog‘iston Rossiyadan qochgan 16 yoshli yigitni deport qildi
Qozog‘iston Respublikasi sudi Rossiyadan qochgan, 16 yoshli Timur Turkovni deportatsiya qilish haqida qaror chiqardi. Bu haqda Zamin.uz xabar berdi.
Turkov Rossiyadagi urush targ‘ibotiga qarshi bo‘lgan qarashlari sababli mamlakatni tark etishga majbur bo‘lgan. U sentyabr oyida Komi Respublikasidan Qozog‘istonga avtostop bilan yetib kelgan va chegarani noqonuniy ravishda piyoda kesib o‘tgan.
Sud ushbu harakati uchun uni aybdor deb topdi va Qozog‘istonga 5 yil muddatga kirish taqiqlandi. Shuningdek, Rossiyada yana 6 oy davomida "erkinlikni cheklash" jazosini o‘tashi belgilandi.
Timurning so‘zlariga ko‘ra, Rossiyada maktablar militarizatsiya qilinmoqda. Katta sinf o‘quvchilari Rossiya–Ukraina urushida halok bo‘lgan harbiylarni dafn marosimlariga jalb qilinmoqda.
Uning qishlog‘idan bir necha kishi urushda halok bo‘lgan yoki bedarak yo‘qolgan. Onasi koronavirus oqibatida vafot etgan, otasi esa oiladan ketgan.
Bobosi va buvisi bilan yashagan Timur mamlakatdagi siyosiy vaziyat tufayli Rossiyani tark etishga qaror qilgan. Timur chegarani o‘z hayoti xavf ostida piyoda kesib o‘tgan.
U tun davomida 17 kilometr yo‘l bosib, charchoq va suvsizlanish sabab hushidan ketgan. Keyinchalik uni Qozog‘iston chegarachilari topib, ijtimoiy markazga joylashtirishgan.
Rossiya konsulligi vakillari va FSB xodimlari uni so‘roq qilgan. Endilikda u Rossiyaga qaytariladi, biroq u siyosiy qarashlari sababli o‘z vatanida xavfsizlik muammolariga duch kelishidan qo‘rqmoqda.
