Kumush narxi ilk bor 66 dollardan oshdi

Jahon bozorida qimmatbaho metallar savdosida muhim voqea sodir bo‘ldi. Bu haqda Zamin.uz xabar berdi.

So‘nggi ma’lumotlarga ko‘ra, kumush narxi tarixda ilk bor yangi rekord darajaga yetdi. 17-dekabr kuni Comex birjasida mart oyiga mo‘ljallangan kumush fyucherslari narxi 4,65 foizga oshib, bir unsiya uchun 66,27 dollarga yetdi.

Bu ko‘rsatkich kumush qiymatining ilk bor 66 dollarlik psixologik chegaradan oshganini bildiradi. Mutaxassislar bunga bir vaqtning o‘zida oltin narxining oshishi va AQSH iqtisodiyotidan kelayotgan noaniq makroiqtisodiy ko‘rsatkichlar sabab bo‘lganini ta’kidlamoqda.

Xususan, AQSH mehnat bozoriga oid so‘nggi hisobotlar investorlar orasida xavotir uyg‘otdi. Noyabr oyida mamlakatda ishsizlik darajasi 4,6 foizga yetib, 2021-yil sentyabridan beri eng yuqori ko‘rsatkichni qayd etdi.

Shu bilan birga, noyabrda iqtisodiyotda 64 mingta yangi ish o‘rni yaratilgani ma’lum qilindi. Bu ko‘rsatkich tahlilchilar kutganidan yuqori bo‘lsa-da, oktyabr oyidagi natijalar qayta ko‘rib chiqilib, o‘sha davrda 105 mingta ish o‘rni qisqargani aniqlangan.

Iqtisodchilar fikricha, mazkur noaniqliklar xavfsiz aktivlarga, jumladan, oltin va kumushga bo‘lgan talabni oshirmoqda. Natijada kumush narxi jahon bozorida o‘sishda davom etib, yangi tarixiy rekordlarni yangilamoqda.