Saudiyaning Midad Energy kompaniyasi Rossiyaning Lukoyl kompaniyasiga tegishli xorijdagi aktivlarni sotib olish bo‘yicha asosiy da’vogar sifatida ko‘rilmoqda. Bu haqda Zamin.uz xabar berdi.
Bu haqda Reuters axborot agentligi muzokaralar jarayonidan xabardor uchta manbaga tayanib ma’lumot berdi. Agentlikning xabariga ko‘ra, Midad Energy Lukoyl aktivlarini 22 milliard dollar miqdorida naqd mablag‘ evaziga xarid qilishni rejalashtirgan.
Shu bilan birga, bu mablag‘lar Rossiyaga nisbatan joriy etilgan sanksiyalar bekor qilinmaguncha maxsus hisobda saqlanishi ko‘zda tutilgan. Manbalardan biri kelishuv jarayonida Amerika kompaniyalari ham ishtirok etishi ehtimolini bildirgan.
Midad Energy kompaniyasi bosh direktori Abdulelo Al-Ayban Saudiya Arabistoni milliy xavfsizlik maslahatchisi Musa’id Al-Aybanning ukasi hisoblanadi. Musa’id Al-Ayban joriy yilning fevral oyida Rossiya va AQSH o‘rtasidagi muzokaralarda ishtirok etgan.
Ularning otasi Muhammad Al-Ayban esa avvalgi yillarda qirollikning razvedka xizmatlarini boshqargan. Reuters agentligi Midad Energy kompaniyasining bu harakati AQSH va Saudiya Arabistoni o‘rtasidagi iqtisodiy aloqalarning faollashuvi fonida yuzaga kelganini ta’kidlagan.
2025 yilda ikki mamlakat mudofaa, energetika va texnologiya sohalarida bir qator kelishuvlarni imzolagan, bu doirada Saudiya Arabistonining 1 trillion dollar miqdorida investitsiya kiritish niyati ma’lum qilingan. Midad Energy va Lukoyl kompaniyalari mazkur masalada Reuters agentligi so‘rovlariga izoh berishdan bosh tortdi.
AQSH moliya vazirligi ham agentlikning so‘roviga darhol javob bermadi.
