Moldova O‘zbekiston va Qozog‘iston bilan vizasiz tartibni saqladi
Moldova mustaqil davlatlar hamdo‘stligi (MDH) davlatlari bilan 1992 yil Bishkek bitimi asosida joriy etilgan vizasiz tartibni bekor qildi. Bu haqda Zamin.uz xabar berdi.
Biroq O‘zbekiston va Qozog‘iston fuqarolari uchun Moldovaga vizasiz borish imkoniyati avvalgidek saqlanib qoladi. Qirg‘iziston va Tojikiston fuqarolari esa endilikda Moldovaga safar qilish uchun viza rasmiylashtirishlari talab etiladi.
Moldova parlamenti ushbu qarorni qabul qilishni MDH institutlaridagi ishtirokni qayta ko‘rib chiqish zarurati hamda milliy qonunchilikni Yevropa Ittifoqi talablariga moslashtirish bilan izohladi. Shu bilan birga, MDHning ko‘plab davlatlari, jumladan O‘zbekiston va Qozog‘iston bilan Moldova o‘rtasida ikki tomonlama kelishuvlar mavjud bo‘lib, bu asosda vizasiz tartib amalda qolmoqda.
