Armanistonda tug‘ilgan har bir bola uchun 1300 dollar to‘lanadi
Armanistonda 2026 yil 1 sentyabrdan boshlab yangi tartib kuchga kiradi. Bu haqda Zamin.uz xabar berdi.
Endilikda har bir tug‘ilgan bola uchun bir martalik to‘lov miqdori 500 ming dram (taxminan 1300 AQSH dollari) etib belgilandi. Bu haqda “Armenia Today” nashri xabar berdi.
Ushbu qaror parlamentning navbatdan tashqari yig‘ilishida qabul qilingan. Avvalgi tartibga ko‘ra, nafaqa miqdori oiladagi bolalar soniga qarab farqlangan.
Masalan, birinchi va ikkinchi farzand uchun 300 ming dram (786 dollar), uchinchi va to‘rtinchi farzand uchun 1 million dram (2600 dollar), beshinchi va undan keyingi bolalar uchun esa 1,5 million dram (3900 dollar) to‘lanardi. Yangi tartib bo‘yicha esa barcha bolalar uchun bir xil miqdorda to‘lov joriy etiladi, bu esa tizimni soddalashtirishga xizmat qiladi.
Bundan tashqari, ko‘p bolali oilalarga doimiy yordam dasturi amalda qoladi. Unga ko‘ra, 2022–2025 yillarda tug‘ilgan oilalardagi uchinchi va undan keyingi bolalarga oyiga 50 ming dram (131 dollar) to‘lab boriladi.
Ushbu to‘lov bola olti yoshga to‘lguniga qadar davom etadi. Yangi qonunchilik 2026 yil 1 yanvardan keyin tug‘iladigan bolalar uchun ham mazkur to‘lovlarni davom ettirishga huquqiy asos yaratadi.
Shuningdek, Xitoy ham tug‘ilishni rag‘batlantirish maqsadida 2026 yildan boshlab tug‘ruq bilan bog‘liq barcha tibbiy xarajatlarni davlat byudjeti hisobidan qoplashni rejalashtirayotganini ma’lum qilgan.
