Madxyada kambag‘al do‘stlar 15 karatli olmos topdi
Hindistonning Madxya-Pradesh shtatida yashovchi ikki do‘st — Satish Xatik va Sajid Muhammad omadli voqea bilan yuzlashdi. Bu haqda Zamin.uz xabar berdi.
Ular ijaraga olingan yer uchastkasidan 15,34 karatli qimmatbaho olmos topib olishdi. Bu haqda BBC nashri xabar berdi.
Topilgan olmos shahar rasmiy baholovchisi tomonidan tekshirilib, uning yuqori sifatli ekanligi tasdiqlandi. Baholovchi Anupam Singxning so‘zlariga ko‘ra, ushbu olmosning bozor qiymati 5–6 million rupiyga teng bo‘lib, bu taxminan 55–66 ming AQSH dollarini tashkil etadi.
Qimmatbaho tosh yaqin kunlarda kimoshdi savdosiga chiqarilishi rejalashtirilgan. Do‘stlar ushbu topilmadan keladigan daromadni hashamatli hayotga yoki biznesga sarflashni rejalashtirishgani yo‘q.
Ularning asosiy maqsadi — opa-singillarini turmushga uzatish va oilalariga moddiy yordam ko‘rsatishdir. Ma’lumotlarga ko‘ra, 24 yoshli Satish Xatik go‘sht do‘konida ishlaydi, 23 yoshli Sajid Muhammad esa meva savdosi bilan shug‘ullanadi.
Ikkalasi ham kambag‘al oiladan chiqqan, bolalikdan do‘st va oilaning kenja farzandlari hisoblanadi. Olmos topilgan Panna tumani qadimdan qimmatbaho tosh izlash bilan mashhur.
Biroq bu hudud Hindistonning iqtisodiy jihatdan eng qoloq mintaqalaridan biri bo‘lib, qashshoqlik, suv tanqisligi va ishsizlik kabi muammolar mavjud.
