Rossiyada 31 o‘zbekistonlik talabaning jarimasi bekor qilindi
Rossiyada tahsil olayotgan 31 nafar o‘zbekistonlik talabaning migratsiya qoidalarini buzganlik uchun belgilangan ma’muriy jazosi bekor qilindi. Bu haqda Zamin.uz xabar berdi.
Bu haqda Oliy Majlisning inson huquqlari bo‘yicha vakili axborot xizmati xabar berdi. Ma’lum bo‘lishicha, O‘zbekistonning Moskvadagi elchixonasida o‘tkazilgan sayyor qabul davomida “Iqtisod oliy maktabi” milliy tadqiqot universitetida tahsil olayotgan o‘zbekistonlik talabalar murojaat qilgan.
Ular migratsiya hisobiga turish bilan bog‘liq muammolarga duch kelganliklarini bildirgan. O‘rganishlar davomida aniqlanishicha, ushbu universitet ma’muriyati chet ellik talabalarning migratsiya hisobini uzaytirish tartiblari haqida vakolatli organlarga o‘z vaqtida ma’lumot bermagan.
Shu sababli talabalar Rossiya hududida ruxsat etilgan 90 kundan ortiq qolib ketgan va bu migratsiya qoidalarini buzish sifatida baholangan. Natijada ularga 40 ming rubl miqdorida jarima belgilangan.
Mazkur masala Rossiya inson huquqlari bo‘yicha vakili tomonidan nazoratga olinib, Ichki ishlar vazirligining Migratsiya xizmati bilan hamkorlikda ko‘rib chiqildi. Tekshiruv natijasida talabalarning vaqtincha turish muddati uzaytirildi va ularga nisbatan jarima yoki ma’muriy chiqarib yuborish choralarini qo‘llamaslik bo‘yicha qaror qabul qilindi.
Shuningdek, ushbu ish natijasida Qozog‘iston, Qirg‘iziston, Tojikiston, Ozarbayjon, Moldova va Belarusdan kelib, Rossiyada tahsil olayotgan 200 dan ortiq talabaning migratsiya bilan bog‘liq muammolari ham ijobiy hal etildi.
