O‘zbekiston va Rossiya ombudsmanlarining hamkorlikdagi harakatlari natijasida Rossiyada tahsil olayotgan 31 nafar o‘zbek talabasi deportatsiya xavfidan saqlab qolindi. Bu haqda Zamin.uz xabar berdi.
Ushbu holat bo‘yicha “Dunyo” axborot agentligi rasmiy ma’lumot berdi. Ma’lum bo‘lishicha, muammo talabalar aybi bilan emas, balki Moskva shahridagi Oliy iqtisodiyot maktabining texnik va tashkiliy xatolari natijasida yuzaga kelgan.
Ta’lim muassasasi talabalar uchun migratsiya hisobini uzaytirishga oid hujjatlarni belgilangan muddatda topshirmagan. Natijada, talabalar 90 kundan ortiq vaqt davomida Rossiyada rasmiy ro‘yxatdan o‘tmagan holda qolib ketgan.
Mazkur vaziyat qonunchilikka ko‘ra, har bir talaba uchun 40 ming rubl miqdorida jarima va mamlakatdan chiqarib yuborilish xavfini keltirib chiqardi. Bunday noxush holatda talabalar O‘zbekistonning Moskvadagi elchixonasiga murojaat qilib, yordam so‘rashgan.
Masala zudlik bilan O‘zbekiston va Rossiya ombudsmanlari darajasida ko‘rib chiqilib, Rossiya Ichki ishlar vazirligiga rasmiy murojaat yo‘llandi. Natijada, talabalarga jarima qo‘llanmaslik va deportatsiya qilinmaslik yuzasidan tegishli ko‘rsatmalar berildi.
Tekshiruv ishlari yakunlangach, barcha talabalarning Rossiyada qolish muddati uzaytirilib, ularning migratsiya maqomi qayta tiklandi. E’tiborlisi, ushbu ish doirasida boshqa MDH davlatlaridan kelgan 200 nafarga yaqin talabaning ham huquqlari himoya qilindi.
Bu voqea ombudsmanlar institutining amaliy ahamiyatini yana bir bor tasdiqladi. Eng muhimi, yoshlarning ta’lim olish huquqi, kelajagi va manfaatlari o‘z vaqtida himoya qilindi.
