Rossiyada mavsumiy gripp bilan kasallanish holatlari keskin oshmoqda. Bu haqda Zamin.uz xabar berdi.
Mutaxassislarning ta’kidlashicha, hozirda mamlakat bo‘ylab har 100 nafar kishidan biri gripp infeksiyasiga chalinmoqda. Ayrim hududlarda esa bir hafta ichida bemorlar soni deyarli ikki barobar ko‘paygan.
Shifokorlar va epidemiologlar vaziyatni nazorat qilib, epidemiyaning eng yuqori cho‘qqisi hali oldinda ekanini ma’lum qilishmoqda. Joriy kuz-qish mavsumida Gonkong grippi (A/H3N2) eng ko‘p tarqalgan virus turi sifatida qayd etilmoqda.
Ushbu virus yuqori yuquvchanligi, tez rivojlanishi va jiddiy asoratlar keltirib chiqarishi bilan xavfli hisoblanadi. Ayniqsa, homilador ayollar, yosh bolalar, keksalar va surunkali kasalliklarga chalingan kishilar xavf guruhiga kiradi.
Gonkong grippi o‘tkir virusli kasallik bo‘lib, asosan nafas yo‘llarini zararlaydi. Kasallik yuqori tana harorati, mushaklar og‘rig‘i, bosh og‘rig‘i va kuchli holsizlik bilan namoyon bo‘ladi.
Ba’zan ko‘ngil aynishi, ishtaha yo‘qolishi va hazm tizimi buzilishi ham kuzatiladi. Mazkur gripp shtammi ilk bor 1968 yilda Gonkongda aniqlangan.
Hozirgi kunda u mutatsiyaga uchragan holda dunyoning turli mintaqalarida tarqalishda davom etmoqda. Shifokorlar aholini salomatlikka jiddiy e’tibor qaratishga, gripp alomatlari paydo bo‘lishi bilan darhol tibbiy yordamga murojaat qilishga va profilaktika qoidalariga rioya etishga chaqirmoqda.
