AQShda o‘zbekistonlik talaba o‘ldirilishi tergov qilinmoqda
AQShda o‘zbekistonlik talaba Muhammadaziz Umurzakovning o‘ldirilishi bo‘yicha tergov ishlari davom etmoqda. Bu haqda Zamin.uz xabar berdi.
Mahalliy huquq-tartibot organlari ushbu jinoyat MIT professori Nuno Lureyroning o‘limi bilan bog‘liq bo‘lishi mumkinligini taxmin qilmoqda. Bu haqda ABC nashri huquqni muhofaza qilish idoralaridagi manbalariga tayanib xabar berdi.
Tergov ma’lumotlariga ko‘ra, gumonlanuvchi sifatida Klaudio Manuel Neveshe Valente ismli shaxs tilga olinmoqda. U ilgari Braun universiteti hududida otishma sodir etganlikda gumon qilingan edi.
Valente Nyu-Gempshir shtatida o‘lik holda topilgan bo‘lib, u o‘z joniga qasd qilgan deb taxmin qilinmoqda. MIT professori Nuno Lureyroning o‘ldirilishi esa Braun universitetidagi otishmadan ikki kun o‘tib sodir bo‘lgan.
Tergovchilar ikki jinoyat o‘rtasida bog‘liqlik bor-yo‘qligini o‘rganmoqda. Ma’lumotlarga ko‘ra, Valente Braun universitetida aspirant bo‘lgan va 2000 yilda o‘qishga qabul qilingan.
Ammo bir necha yil o‘tib, u o‘qishdan chetlatilgan. Uning shaxsi kuzatuv kameralaridagi yozuvlar va avtomobil ijarasi ma’lumotlari orqali aniqlangan.
Hozircha rasmiylar gumonlanuvchining bu jinoyatlarga aloqadorligi va motivlari haqida ma’lumot bermagan. Eslatib o‘tamiz, Muhammadaziz Umurzakovning o‘ldirilishi 14 dekabr, yakshanba kuni, imtihon davom etayotgan paytda sodir bo‘lgan.
Qurollangan shaxs muhandislik binosida o‘t ochgan va bu hodisa jamoatchilikni larzaga solgan. Tergov ishlari davom etmoqda.
