Rossiya Federatsiyasi Davlat dumasi bir hafta ichida korrupsiyaga qarshi qonunchilikka sezilarli o‘zgartirishlar kiritdi. Bu haqda Zamin.uz xabar berdi.
Yangi tartibga ko‘ra, endilikda amaldorlar va davlat organlaridagi xalq vakillari o‘z daromadlari haqida har yili hisobot berish majburiyatidan ozod qilindi. Yillik deklaratsiyalar endi faqat "zarur holatlar"da taqdim etiladi.
18 dekabr kuni qabul qilingan qonun davlat xizmatchilari, munitsipal xodimlar hamda davlat ulushi bo‘lgan yirik korporatsiya vakillariga imtiyozlar berdi. 2009 yildan buyon amalda bo‘lgan va amaldorlar hamda ularning oila a’zolarining daromad va xarajatlarini ochiqlashni talab qilgan tizim faqat "alohida ehtiyoj" tug‘ilgandagina qo‘llaniladi.
Qonun tashabbuschilaridan biri Vasiliy Piskaryovning fikricha, bu o‘zgarish "eskirgan va samarasiz nazorat tizimi"ni bekor qilish imkonini beradi. Uning ta’kidlashicha, korrupsiyaga qarshi kurash to‘xtamaydi, balki jarayon raqamlashtiriladi.
Endilikda amaldorlarning moliyaviy holati maxsus "Poseydon" axborot tizimi orqali kuzatib boriladi. Ushbu tizim prezident administratsiyasi tomonidan boshqariladi va jamoatchilik uchun yopiq bo‘ladi.
Shunga qaramay, ayrim holatlarda daromadlar haqida ma’lumot berish majburiy bo‘lib qoladi. Masalan, saylovlarda ishtirok etishda, lavozimga tayinlanishda yoki yirik xaridlar amalga oshirilganda deklaratsiya topshirish talab etiladi.
Agar yangi qonun Federatsiya kengashi tomonidan ma’qullanib, prezident Vladimir Putin tomonidan imzolansa, u 2026 yil 1 yanvardan kuchga kiradi. Ma’lumot uchun, 2022 yildan buyon Rossiyada amaldorlarga o‘z daromadlarini internetda e’lon qilmaslik huquqi berilgan edi.
Shuningdek, Ukrainadagi harbiy harakatlarda ishtirok etgan yoki sanksiyalar sababli hisobot topshira olmagan shaxslar javobgarlikdan ozod qilingan. Yangi qonun esa ushbu imtiyozlarni yanada mustahkamlaydi.
