AQShda dorilar narxi 70 foizgacha arzonlashadi
AQSh prezidenti Donald Tramp va to‘qqizta yirik dori ishlab chiqaruvchi kompaniya dori narxlarini pasaytirish bo‘yicha kelishuvga erishdi. Bu haqda Zamin.uz xabar berdi.
Ushbu kelishuv davlat yordamini oluvchi aholiga va dorilarni naqd pulga xarid qiluvchilarga taalluqli bo‘ladi. Kelishuvga ko‘ra, Medicaid dasturi orqali sotiladigan ko‘plab dorilar narxi tushiriladi.
Ayrim dorilar esa odamlarga bevosita katta chegirmalar bilan taqdim etiladi. Bu orqali AQShda dori narxlarini boshqa rivojlangan davlatlar darajasiga yaqinlashtirish maqsad qilingan.
Rasmiylarning ma'lumotiga ko‘ra, ayrim dorilar narxi hozirgi darajaga nisbatan 70 foizgacha arzonlashishi mumkin. Buning evaziga kompaniyalar uch yil davomida qo‘shimcha bojlar va cheklovlardan ozod qilinadi.
Bundan tashqari, yangi dorilar AQShda boshqa rivojlangan davlatlardagidan qimmatroq bo‘lmasligi kafolatlanadi. Hukumat ushbu kelishuv orqali dori xarajatlarini sezilarli darajada kamaytirishni rejalashtirmoqda.
Dori ishlab chiqaruvchi kompaniyalar esa AQShda ishlab chiqarish va ilmiy tadqiqotlarga katta mablag‘ yo‘naltirishini ma’lum qildi. Ushbu kelishuv dori narxlarini pasaytirish borasida muhim qadam sifatida baholanmoqda.
