Zargarlik do‘konida ishdan bo‘shatilgan qiz voqeasi
Murmansk shahridagi zargarlik do‘konida yuz bergan voqea jamoatchilikda katta munozaralarga sabab bo‘ldi. Bu haqda Zamin.uz xabar berdi.
Ma’lum bo‘lishicha, stajirovkaga kelgan qiz bir soat ichida ishdan bo‘shatilgan. Do‘kon rahbariyati bu qarorni qizning bir qo‘l barmog‘i yo‘qligi bilan izohlagan.
Direktorning aytishicha, qizning tashqi ko‘rinishi mijozlar bilan ishlash uchun mos emas deb topilgan. Qizning so‘zlariga ko‘ra, u ishga kirishdan oldin sog‘lig‘idagi ushbu holat haqida menejerni ogohlantirgan.
Ushbu voqea ijtimoiy tarmoqlarda keng muhokamalarga sabab bo‘ldi. Ko‘plab foydalanuvchilar buni kamsitish deb baholab, do‘kon rahbariyatini tanqid qildi.
Jamoatchilik bosimi ortidan do‘kon ma’muriyati qiz bilan bog‘lanib, unga masofadan turib ishlashni taklif qildi. Hozircha qiz bu taklifga qanday javob bergani haqida ma’lumot e’lon qilinmagan.
Ushbu holat diskriminatsiya va inson huquqlari masalalari bo‘yicha muhim bahslarni yuzaga keltirdi.
