Nike aksiyalari Xitoydagi pasayish sabab arzonlashdi
Dunyoga mashhur Nike kompaniyasining aksiyalari Xitoy bozoridagi savdo natijalari kutilganidek chiqmagani sababli keskin pasayish kuzatildi. Bu haqda Zamin.uz xabar berdi.
Kompaniyaning choraklik moliyaviy hisobotlari e’lon qilingach, aksiyalar qiymati qariyb 10 foizga arzonlashdi. Garchi hisobotdagi asosiy ko‘rsatkichlar tahlilchilar prognozlaridan yuqori bo‘lsa-da, investorlar Xitoy bozoridagi sust rivojlanishga katta e’tibor qaratdilar.
2025 yilning 30 noyabrida yakunlangan chorakda Nike kompaniyasining umumiy daromadi 12,4 milliard dollarni tashkil etdi. Bu o‘tgan yilning shu davriga nisbatan 1 foizlik o‘sish demakdir.
Bir aksiyaga to‘g‘ri kelgan foyda 0,53 dollarni tashkil etib, bozor prognozidan yuqori natija qayd etildi. LSEG tomonidan shakllantirilgan prognozga ko‘ra, kompaniyaning daromadi 12,1 milliard dollar, aksiyadan foyda esa 0,37 dollar bo‘lishi kutilgan edi.
Shunga qaramay, Xitoydagi uzoq davom etayotgan pasayish investorlarni xavotirga solmoqda. Xitoy bozorida savdo hajmi 17 foizga kamayib, 1,42 milliard dollarga tushdi.
Mutaxassislarning fikricha, bu pasayish bir necha chorakdan beri davom etayotgan salbiy tendensiyaning natijasidir. Shuningdek, kompaniyaning boshqa moliyaviy ko‘rsatkichlari ham ijobiy taassurot qoldirmadi.
Nike’ning sof foydasi 32 foizga kamaydi, yalpi foyda marjasi esa tariflar va xarajatlar bosimi sababli 40,6 foizga tushdi. Nike Direct kanallari orqali daromad 8 foizga qisqargan bo‘lsa, raqamli savdo segmentida ikki xonali pasayish kuzatildi.
Kompaniya rahbariyati kelgusi chorakda ham daromadga bosim saqlanib qolishini taxmin qilmoqda. Shu bilan birga, boshqaruv hozirgi vaziyatni biznesni qayta tiklash va moslashuv uchun imkoniyat deb baholamoqda.
Kompaniya asosiy bozorlarda o‘sishni tiklash uchun strategiyani yangilashni rejalashtirmoqda.
