Tayvanda metroda hujum: 4 kishi halok bo‘ldi

19-dekabr kuni Tayvanda jamoat xavfsizligiga jiddiy putur yetkazgan og‘ir voqea yuz berdi. Bu haqda Zamin.uz xabar berdi.

Mahalliy soat bilan taxminan 17:20 da 27 yoshli erkak metropolitenning eng gavjum bekatlaridan birida tutunli granatalar va “Molotov kokteyllari”ni uloqtirdi. Bu holat bekatdagi yo‘lovchilar orasida vahima va qo‘rquvni kuchaytirdi.

Shundan so‘ng, u metro yo‘nalishi bo‘ylab taxminan 800 metr masofani yugurib o‘tib, yo‘l-yo‘lakay uchragan bir necha kishini pichoqlagan. Ikkinchi bekatga yetib borgach, hujum davom etgan: u yerda ham granatalar tashlangan va odamlarga pichoq bilan hujum qilingan.

Hujumdan so‘ng gumondor yaqin atrofdagi binolardan birining tomidan pastga sakrab tushgan. U og‘ir jarohatlar bilan shifoxonaga olib borilgan, ammo shifokorlar uning hayotini saqlab qola olishmagan.

Ushbu hodisa natijasida halok bo‘lganlar soni to‘rt kishiga yetdi. Qurbonlar orasida hujumni to‘xtatishga uringan va jasorat ko‘rsatgan erkak ham bor.

U yarador holda shifoxonaga yetkazilgan, ammo keyinchalik vafot etgan. Rasmiy ma’lumotlarga ko‘ra, gumondor Chang Ven ismli Tayvan fuqarosi bo‘lgan.

Mamlakat bosh vaziri Cho Jung ushbu voqeani “qasddan amalga oshirilgan jinoyat” deb atadi. Tergovning dastlabki ma’lumotlariga ko‘ra, hujumni gumondor yolg‘iz amalga oshirgan.

Bu voqeadan so‘ng Tayvan bo‘ylab temiryo‘l va metro bekatlarida xavfsizlik choralari kuchaytirildi. Qo‘shimcha patrullar joylashtirildi va tekshiruvlar soni oshirildi.

Tayvanda jinoyatchilik darajasi nisbatan past hisoblanadi va bunday zo‘ravonlik holatlari kam uchraydi. So‘nggi shunga o‘xshash yirik voqea 2014-yilda sodir bo‘lgan edi.

O‘shanda Taypey metrosida to‘rt nafar inson halok bo‘lib, aybdor keyinchalik qatl etilgan edi. Bugungi hujum esa Tayvan jamiyatiga kutilmagan og‘ir zarba bo‘ldi.