Tayvanda metroda hujum: 3 o‘lik, 9 jarohat
Tayvan poytaxti Taypey shahrida metroda sodir bo‘lgan pichoqlash hujumi oqibatida uch kishi halok bo‘ldi, to‘qqiz kishi jarohat oldi. Bu haqda Zamin.uz xabar berdi.
Hujumni 27 yoshli Chang Ven amalga oshirgan. U avval markaziy metro bekatida tutun bombalaridan foydalangan, keyin esa boshqa bekatga o‘tib, yo‘lovchilarga pichoq bilan hujum qilgan.
Hujumchi keyinchalik ko‘p qavatli binodan tushib ketib halok bo‘lgan. Voqeaning sabablari hozircha noma’lum.
Tayvanda bunday hodisalar kam uchraydi. Oxirgi marta shunga o‘xshash voqea 2014-yilda sodir bo‘lgan edi.
Hodisa mahalliy vaqt bilan soat 17:20 da, shahar markazida eng gavjum paytda yuz bergan. Ijtimoiy tarmoqlarda tarqalgan videolarda odamlarning vahimaga tushib qochayotgani, hujumchining esa qo‘lida katta pichoq bilan harakatlanayotgani aks etgan.
Tayvan bosh vaziri Cho Jung-tai metro, temiryo‘l bekatlari va aeroportlarda xavfsizlik choralarini kuchaytirishni buyurdi. Prezident Uilyam Lay voqeani tezkor o‘rganish va tergov qilishga topshiriq berdi.
Hozirda tegishli organlar hujumchining motivlarini va boshqa ehtimoliy aloqador shaxslarni aniqlash ustida ish olib bormoqda.
