Poyezd va fillar to‘qnashuvi: 7 fil halok bo‘ldi
Hindistonning shimoli-sharqidagi Assam shtatida poyezd va fillar o‘rtasida fojeali hodisa yuz berdi. Bu haqda Zamin.uz xabar berdi.
20 dekabr kuni Xojai tumanida Dehli tomon harakatlanayotgan poyezd fillar galasi bilan to‘qnashdi. Oqibatda yettita fil halok bo‘ldi, yana biri og‘ir jarohat oldi.
Ushbu hudud fillar uchun maxsus yo‘lak hisoblanmagan. Dastlabki ma’lumotlarga ko‘ra, poyezd mashinisti hayvonlarni ko‘rgan zahoti favqulodda tormozni ishga tushirgan.
Biroq qo‘rqqan fillar poyezdga qarab yugurgan va kuchli to‘qnashuv sodir bo‘lgan. Hodisa natijasida poyezdning beshta vagoni relsdan chiqib ketgan.
Yaxshiyamki, yo‘lovchilar orasida jabrlanganlar yo‘q, ammo hayvonlar orasida yo‘qotishlar katta bo‘ldi. Mazkur hodisadan so‘ng, temiryo‘l qatnovi vaqtincha to‘xtatilib, poyezdlar aylanma yo‘llar orqali harakatlantirilmoqda.
Ushbu voqea inson faoliyati va yovvoyi tabiat o‘rtasidagi ziddiyatlarning yana bir misoli sifatida qayd etildi. Mutaxassislar bunday hududlarda xavfsizlik choralarini kuchaytirish zaruriyatini yana bir bor ta’kidlashmoqda.
