Saudiya Arabistonida o‘lim jazosi amaliyoti bu yil rekord darajaga yetdi. Bu haqda Zamin.uz xabar berdi.
Rasmiy ma’lumotlarga ko‘ra, 2025-yilda kamida 347 kishi o‘lim jazosiga hukm qilingan. Bu ko‘rsatkich 2024-yildagi 345 kishilik rekorddan oshib, mamlakat tarixidagi eng yuqori darajaga chiqdi.
Hukm qilinganlar orasida xorijlik fuqarolar, jurnalistlar va voyaga yetmaganlik davrida jinoyat sodir etgan shaxslar ham bor. Ularning uchdan ikki qismi giyohvandlik moddalariga aloqador jinoyatlar uchun jazolangan.
Shuningdek, besh nafar ayol ham o‘lim jazosiga hukm qilingan. Ko‘plab holatlar BMT xalqaro standartlariga zid deb baholanmoqda.
Saudiya Arabistoni hukumatining bu boradagi rasmiy izohi mavjud emas. Ekspertlar va inson huquqlari tashkilotlari mamlakatda qiynoqlar va majburlangan tan olishlar keng tarqalganini ta’kidlamoqda.
Shuningdek, ijro etishdan oldin mahkumlarning oilalariga xabar berilmasligi va jasadlarning qaytarilmasligi kabi holatlar inson huquqlari nuqtai nazaridan jiddiy muammolarni keltirib chiqarmoqda. Xalqaro tashkilotlar o‘lim jazosiga cheklov kiritishni, barcha mahkumlarga yuridik yordam va konsullik xizmatlari ko‘rsatilishini, shuningdek, ijro etish jarayoni bo‘yicha aniq ma’lumotlar oshkor qilinishini talab qilmoqda.
Mamlakatda ijtimoiy va iqtisodiy islohotlar amalga oshirilayotgan bo‘lsa-da, inson huquqlari masalasidagi holat jiddiy tashvish uyg‘otayotganini mutaxassislar qayd etmoqda.
