18-dekabr kuni Saudiya Arabistonining ayrim hududlarida kutilmagan tabiiy hodisa – qor yog‘ishi kuzatildi. Bu haqda Zamin.uz xabar berdi.
Ushbu hodisa mamlakatda so‘nggi 30 yil ichida ilk bor kuzatilgani sababli alohida e’tiborni tortdi. Anadolu axborot agentligining xabariga ko‘ra, qor asosan shimoli-g‘arbiy va markaziy hududlarda yog‘gan.
Mahalliy ommaviy axborot vositalari Ar-Riyod shahri va uning atrofidagi qor yog‘ishini “juda kam uchraydigan voqea” sifatida baholagan. Al Arabiya telekanali esa bu hodisani “tarixiy” deb atab, mamlakatda bunday ob-havo uzoq yillardan beri kuzatilmaganini ta’kidladi.
Sinoptiklar oldindan havo haroratining keskin pasayishi mumkinligini e’lon qilgan edi. Ayrim hududlarda do‘l, kuchli yomg‘ir va momaqaldiroq kuzatilishi sababli ob-havo xavfi qizil va to‘q sariq darajada belgilandi.
Shuningdek, nashrlarda qayd etilishicha, nafaqat Saudiya Arabistonida, balki boshqa arab davlatlarida ham sovuq havo oqimlari ta’sirida kuchli yomg‘irlar yog‘moqda. Mutaxassislar bu holatni mavsumiy emas, balki iqlim o‘zgarishlari bilan bog‘lamoqda.
