AQShning Braun universiteti hududida sodir bo‘lgan otishma bo‘yicha yangi ma’lumotlar e’lon qilindi. Bu haqda Zamin.uz xabar berdi.
Ushbu hodisa natijasida ikki nafar talaba, jumladan, O‘zbekiston fuqarosi Muhammadaziz Umurzoqov hayotdan ko‘z yumgan edi. The Guardian nashrining xabariga ko‘ra, ushbu ish bo‘yicha asosiy gumonlanuvchi sifatida ko‘rilayotgan 48 yoshli Portugaliya fuqarosi Klaudio Manuel Neves Valentening jasadi sud-tibbiy ekspertiza orqali tekshirilgan.
Tekshiruv natijasida ma’lum bo‘lishicha, u 18 dekabr kuni topilishidan taxminan ikki kun oldin o‘z joniga qasd qilgan. Rasmiylar bergan ma’lumotga ko‘ra, otishma 13 dekabr kuni universitetning muhandislik binosida sodir bo‘lgan.
Hodisa oqibatida ikki talaba halok bo‘lgan, yana to‘qqiz kishi turli darajada jarohat olgan. Shuningdek, tergov davomida Neves Valentening 16 dekabr kuni uyida otib o‘ldirilgan MIT professori Nuno Lureyru bilan ehtimoliy aloqasi ham o‘rganilmoqda.
Tergovchilar ma’lum qilishicha, Neves Valente avval Braun universitetida doktorant sifatida tahsil olgan. Hozircha hodisaning aniq sabab va motivlari rasman ochiqlanmagan.
Tergov ishlari davom etmoqda, va rasmiylar barcha tafsilotlar chuqur o‘rganilayotganini ta’kidlamoqda.
