Nogiron muhandis ilk bor kosmosga parvoz qildi
Germaniyalik muhandis Mikaela Benthaus nogironligi bo‘lishiga qaramay, suborbital kosmik parvozni muvaffaqiyatli amalga oshirdi. Bu haqda Zamin.uz xabar berdi.
Bu haqda Deutsche Welle nashri xabar berdi. Ma’lum qilinishicha, 20 dekabr kuni Blue Origin kompaniyasining New Shepard kosmik kemasida o‘tkazilgan parvoz taxminan 11 daqiqa davom etgan.
33 yoshli Benthaus shu tariqa belidan past qismi falaj bo‘lgan holda kosmosga chiqqan dunyodagi birinchi inson sifatida tarixga kirdi. U 2018 yilda velosipedda yiqilib og‘ir jarohat olgan va shundan beri nogironlar aravachasida harakatlanadi.
Parvozdan so‘ng Mikaela Benthaus bu tajribani o‘z hayotidagi eng unutilmas voqea deb ta’rifladi. U inson orzularidan voz kechmasligi kerakligini, hatto kichik imkoniyat ham ularga erishish uchun yetarli bo‘lishi mumkinligini ta’kidladi.
Benthaus bolaligidan kosmosga qiziqib kelganini va bunga “Yulduzlar jangi” filmi turtki bo‘lganini ham qo‘shimcha qildi. New Shepard ekipajida Benthausdan tashqari yana besh nafar ishtirokchi bo‘lgan.
Ular orasida germaniyalik aerokosmik muhandis Hans Kyonigsmann ham bor edi. U 2021 yilgacha SpaceX kompaniyasida ishlagan.
Kyonigsmann parvozdan keyin Yer va uning atmosferasi manzarasi juda ta’sirli, kosmos esa kutilganidan ham qorong‘u ekanini aytdi. Mazkur missiya Jeff Bezosga tegishli Blue Origin kompaniyasining 16-pilotli parvozi bo‘lib, so‘nggi yillarda 80 ga yaqin badavlat inson qisqa muddatli kosmik sayohatlarda qatnashgan.
Parvoz chiptalari narxi oshkor qilinmagan.
