Kambodja va Tailand mudofaa vazirliklari vakillari 24-dekabr kuni o‘zaro tinchlik masalalarini muhokama qilish maqsadida rasmiy uchrashuv o‘tkazishni rejalashtirmoqda. Bu haqda Zamin.uz xabar berdi.
Bu haqda Tailand tashqi ishlar vaziri Sixasak Fuangketkeo ma’lum qildi. Reuters agentligining xabar berishicha, mazkur uchrashuvni tashkil etish qarori 22-dekabr kuni Kuala-Lumpurda o‘tkazilgan Janubi-Sharqiy Osiyo davlatlari tashqi ishlar vazirlari yig‘ilishida qabul qilingan.
Ta’kidlanishicha, muzokaralar tashqi kuchlar, jumladan, AQSH yoki Xitoyning aralashuvisiz, faqat ikki davlatning o‘zaro kelishuvi asosida o‘tkaziladi. Tailand va Kambodja vaziyatni mustaqil ravishda hal qilishga intilmoqda.
Dekabr oyi boshida Bangkok va Pnompen o‘rtasidagi chegaradosh hududlarda keskinlik yuzaga kelgan edi. Bu hududda qurolli to‘qnashuvlar sodir bo‘lib, ikki haftada har ikki tomondan 80 ga yaqin inson halok bo‘ldi, 500 mingga yaqin aholi o‘z uyini tark etishga majbur bo‘ldi.
Tailand va Kambodja bir-birini tajovuzkor harakatlarda ayblamoqda. Avval oktyabr oyida AQSH prezidenti Donald Tramp ishtirokida sulh bitimi tuzilgan edi.
Ushbu bitimga ko‘ra, minalarni tozalash, qo‘shinlarni va og‘ir qurollarni chegara hududlaridan olib chiqish shartlari belgilangan edi. Biroq tomonlar bu shartlarga rioya qilmaganlikda bir-birini ayblashmoqda.
Mutaxassislarning fikricha, ushbu uchrashuv mintaqadagi taranglikni yumshatish va uzoq muddatli barqarorlikka erishish uchun muhim qadam bo‘ladi. Muzokaralar nafaqat ikki davlat, balki butun Janubi-Sharqiy Osiyo uchun ahamiyatlidir.
